Xé l'èra de ƚa comunicasion, i dixe, ma da mi farìa prima a rivar létare scrite co' ƚa pena de òca e portàe da ƚa diƚigensa de 'l Serenissimo Prénsipe (se San Marco el ne faxese ƚa grasia de riaverlo). Xé 47 ani che pago boƚete, prima a SIP, dòpo a Telecom e dòpo a Tiscali e dòpo a Vodafone, e no gò mai saltà un pagamento. Sò rivà, sensa speranse e oviamente sensa rexultadi, a pagar anca bonamenti da 20 Mbps (megabit par secondo), sentìndome dir che no podarà mai rivar pì de 5. De fato, da do ani rivava 3 e mèxo, e, co' i ùltimi laori, da do mexi riva 1 e mèxo; se i riva, parché ògni xorno, da mexodì a ƚe sìe-sète de sera, ƚa linia ƚa xé destacada el 97-98% de'l tenpo. E el laoro? e ƚe axiende che ƚe gà ƚa desgrasia de servir i abitanti de sto Paexe? "Chissenefrega", i te dixe co' italica "flemma", no ghe ne frega gninte, e i lo dixe ciaro e tondo: no ghe xé gninte da far par i utenti de i teƚèfoni de ƚe Caene.

Se sà soƚo che el "Comune di Venezia" (come che i se definise) el gà portà ƚa fibra òtica gnintepopodemancoché a'l "frequentatissimo" "Parco di Catene" (cioè cheƚa sòrta de ariopòrto che ghe xé de drio a'l muro de'l pianto, in via Trièste). Cuesto gà da saverlo tuti, urbi et orbi, sinò no i savarìa còsa far ƚa pròsima vòlta che i vegnarà ciamài in gabina eletoral. Cusì, se vòjo continuar a laorar, gò da cronparme un PC portàbiƚe (parché xé cool, tuti i "cittadini" i ghe ne gà uno, i ghe fà anca "le primarie") e andar a spedir i me files so'l canpo in mèxo a i sgrèbani, indove che (i dixe) ghe xé el WiFi "a gratis" (pagà da i produtori de richesa che i paga tanse e inpòste e no i gà tenpo de lèxer el Gaxetin o ƚa "Gazzetta Ufficiale").

Purmasa par ƚori però, mi no sò democràtego e no pòso partesipar de 'l so entuxiasmo.

E avanti Savoja (che i ne gà portà na fan ròja).