Perìodo de pauxa e vardo còsa che òfre el marcà (no xé gninte vero, xé che sò pigro, parché invense gavarìa da far laori de axornamento portfolio, canpionari, modèƚi novi par Nadal, ect....).

Fra calche mexe, i primi de'l 2013, casca ƚa "scadensa" de axornamento par el còrpo màchina primario in formato 24X36 e me vardo intorno. Magari pol interesarte anca a ti...

El còrpo primario, inte'l me laoro,  el xé cueƚo da doparar par fotografìa de eventi, reportage, teatro, e sport. Un fià de tuto e co' ƚe caraterìsteghe seguente:

• Ergonomìa/màsima rapidità de execusion (par màchine da ritrato in studio no ghe xé da bexon)
• Cuaƚità da varentir i màsimi ingrandimenti, a richièsta 1X1,5mt. e pasa
• Màsime prestasion in scarsa luxe, daché i eventi ancùo se ƚi scata scuaxi senpre sensa flash (Doparando el flash no se consìdera gnanca ƚa cusion. Ƚa me D70 ƚa xé sincronexada co' i flash fin a 1/8000 de sec. e no me ocor altro)

In xènare un poco de tuto baƚansà par el mèjo, ma ƚa ùltima caraterìstega ƚa xé preponderante. Cusì se fenise, purmasa, co' màchine grande e pexante, ma sto ano ghe xé novità interesante...

Finalmente, fenìa ƚa corsa a i megapìksel (7-8 i basta par scuaxi tuto) e rivài a cuaƚità stra-oltra-terèstre co' i vaƚori ISO, i produtori de reflex i se gà butà a investir so'l dixegno de còrpi pì conpati e lixièri. Xà ƚa D700, cuatro ani fa, ƚa xèra stada na semi-revoƚusion inte sto senso. Dèso xé rivà el momento de màchine come ƚa Nikon D600 e ƚa Canon 6D, dimension e pexo oncora pì ridote.

Siando rivà, secondo ƚa me tavèƚa de marcia, el momento de axornar, ƚa sjèlta par mi, sic stantibus rebus, ƚa xé fra D800 e D600. Co xé vegnùo fora ƚa D800, sie mexi fà, me xé cascà i brasi... trentasìe megapìksel... da salvar, far dopia còpia de backup, vèrxar da RAW e tratar... da exaurimento nervoxo! (va ben che in formato DX ƚa tira xó 16Mp, resoƚusion un fià pì terèstre...). Ma un mexe fà i gà prexentà ƚa D600, pì lixièra e co' 24 megapixel (senpre masa, ma 10 megapìksel in formato DX, interesante) e gò scominsià a èsar pì interesà. Co' ƚa D800 semo a dimension e pexo de'l còrpo presapoco a pari co' ƚa D700; co' sta D600, pì cèa e lixièra, sarìa pì contento. Me sparagnarìa de andar a noƚexar màchine da 24Mp (a 150 euri a'l xorno) co me vien richièsto, doparando do màchine in una (e a'l prèso de una): un FX e un DX, co' ƚe dimension de na pìcoƚa DX. Ma ƚe prestasion de cui sora?

In scarsa luxe - Vaƚutasion teòrica:
Daché fin a 1600 ISO no canbia gninte, confronto i RAW (sensa ridusion de desturbo) partindo da 3200ISO, sensibiƚità che dòparo da senpre sensa problèmi co' ƚa D700.
(Tegnir conto che i JPG cuà soto i pèrde naturalmente na sčiantina da'l orixenal. Gò inserìo anca ƚa Canon 5DmarkIII par riferimento, parché ƚa gà el steso formato de sensor e ƚa xé de ƚa stesa xenerasion de D600, D800 e 6D, defati ƚa xé mèjo de ƚa precedente 5DmarkII. Xé a fogo el ciòdo, ancaben co' obietivi difarenti so màchine difarente, da cui ƚa difarensa de piani focaƚi, siando incuadrà ogèti a 3 dimension. Naturalmente el xé un crop a'l 100%, da cui ƚa difarensa de proporsion, daché ghe xé cuatro màchine a: 24Mp/D600, 22Mp/5DMIII, 36Mp/D800 e 12Mp/D700. I file de 'l confronto i vien da dpreview.com)

	A 3200ISO a liv. piksel, D600 e D700 ƚe xé in pole position presapoco a pari; naturalmente riduxendo i m.p. da 24 a 12 (stra-suficente soto i 50X70cm de stanpa) ƚa D600 ƚa rexultarà lexermente pì "sneta". Restando a liv. pìksel, ghe xé da dir che el desturbo el xé anca pì "orgànego", tipo grana de film, e ƚa stanpa in formati pì grandi ƚa sarà piaxente anca co' poca, o nisuna, redusion; un bici de redusion de desturbo, màscara seletiva so i detali, e se pol stanpar in formato gigante. Co' i ùltimi stromenti de Camera Raw se pol ansi xontar un efèto grana de film sensa 'vér paura de gninte. Me sento ben, ƚa D800 ƚa xé lexermente pì desturbada, cuà. Me sento infrancà.
	A 6400 ISO ƚa difarensa co' ƚa D800 ƚa xé oncora pì marcada, a liv. piksel. El desturbo chroma el xé a pari co' ƚa D700, ma ƚa strutura orgànega de'l desturbo ƚa ghe dà un vantaxo evidente a ƚa D600. Ƚa D700 ƚa scominsia anca a mostrar timidamente na sčiantina de desturbo de luminansa, ƚa D600 nò. A 6400 rivo abitualmente co' ƚa D700 sensa acrobasìe particoƚari, tirando fora imàxine snete co' tuti i detali che se vol. Savendo che ƚa D800 ridota da 36 a 12 Mp ƚa rende presapoco come na D700, podemo fegurarse che ƚa D600 ƚa pol far anca mèjo. Benon, 'vanti adaxio.
	A 12800 ISO el desturbo chroma e luma so ƚa D700 el xé evidente (èco parché no ƚa dòparo scuaxi mai a sti livèƚi). So ƚa D800 el desturbo de crominansa el xé oncora pì evidente, ma se pol spetarse che el vègna a pari co' ƚa D700 na vòlta redoto el fotograma da 36 a 12 Mp. Ƚa D600 ƚa xé soprendente, dirìa (almanco) 1 stop intièro de vantaxo so ƚa D700, stanpàbiƚe deƚongo fora da ƚa màchina in formati "normaƚi" (30X40cm) sensa nisun intervento, el che 'l me dixe che ƚa xé na sensibiƚità doparabiƚìsima anca par formati poster co' un mìnimo de cura de desturbo e detalio. Semo presapoco a 1/2-3/4 de stop soto ƚa prestasion de ƚa "D3s" el non plus ultra de tuti i tenpi, che no i xé stài boni de superar gnanca co' ƚa ùltima D4. ! Ƚa dinàmica de i coƚori, aumentando ƚa sensibiƚità, ƚa caƚa par tute ste màchine sensa difarense.

Co' 24 megapiksel de resoƚusion ghe xé anca masa posibiƚità de ingrandimento e incuadradura, tanto che ƚa dopararìa 3/4 de ƚe vòlte in formato DX, co' cui se pol 'ver RAW da 10 Mp. I 24 Mp i sarìa riservài a co se dòpara alti ISO, o co se vol andar pì larghi co' i grandàngoƚi, o, naturalmente, co 'l cliente el vol stanpe da mètro e pasa. Ƚa coertura de i sensori de'l sistèma autofocus, defati, ƚa par mèjo dimensionada par el formato DX che nò par el FX.

Co' 5,5 fps ƚa xé pì ràpida de ƚa D700 anca a elaborar i dati (che, no desmenteghémose, i xé 24 invense de 12Mp, el dopio); xé el chip co'l Expeed 3 a far el laoro. 5_fotogrami_e_mèxo a'l secondo anca in RAW. Gninte de straordenario cuà, xé prestasion de letrònega, de tratamento dati, in incremento come so i PC. Ƚa D700 però ƚa riva a 8 fps co'l paco baterìa de xonta (gò sparà a 8fps nòma che na vòlta comuncue, sport ghe ne faso pocheto). 5,5 invense i xé el màsimo co' sti 24megapìksel de ƚa D600 anca co'l paco baterìa. Xé da tegnirse daconto ƚa D700 par ocaxion particoƚari, anca parché gò idèa che ƚa gabia pì prestasion de'l autofocus so'l formato intièro.

Ƚa sensibiƚità ƚa parte da baxe 100 ISO invense che 200, el che xé òro par ƚa fotografìa co' flash in studio (mai doparà na màchina digital a baxe ISO cusì basa). I flash da studio i gà ƚa potensa de ƚa bonba H, siando nati a i so tenpi, cioè co ghe xèra i film, par cui 50 ISO i sarìa anca mèjo.

El tenpo de oturasion màsimo el riva "soƚo" a 1/4000 de sec. e el sincro flash a 1/200 de sec., ma 1) Rivo a 1/8000 soƚo rarìsime vòlte, co dòparo el flash soto el sol, e inte sto caxo dòparo ƚa me D70, mai coèrto co' nisuna altra màchina e 2) 1/4000 a 100ISO el xé ƚa stesa ròba che 1/8000 a 200ISO, siché ƚa prestasion (teòrica parché no se ƚa dòpara mai...) ƚa xé conpagna. 3) 1/200 de sincro flash in studio/intèrni el xé stra-suficente.

Se pol tirar xó video in Full HD so i do formati, FX e DX, gran comodità come co' ƚa Panasonic sèrie GH (xé da verifegar, parché ghe xé chi che i dixe che in DX no se gà gran rexultadi). 

Ƚa dinàmica a baxe ISO ƚa pasa i 14 EV. Da paura. E scatando RAW a 14 bit par canal se pol sfrutarla.

Ƚa dopia memory card ƚa permete de far el backup istantanio in màchina.

In definitiva "na bonba", a prima vista.

Visto cusì, gavarìa scuaxi decixo, ma còsa ghe xéƚo de mauco inte i conti? Sta D600 ƚa costa (ancùo, otobre 2012) 700 euri manco de ƚa D700 cuatro ani fà, e 800 euri in manco de ƚa D800 ancùo. Parcòsa? In sìntexi: cuaƚità de costrusion e ergonomìa. D700 e D800 ƚe xé màchine de ƚa stesa categorìa, còrpo in blòco intièro in lega de magnèxio, comandi a "boton" tipo D300, D200, D3, D4..., contato de flash PC (prontor-compur) e altri bàgoƚi profesionaƚi. Ƚa D600 ƚa xé costruìa esensialmente come na D7000 e ƚa me vècia D70 (ma, de xonta, ƚa xé inpermeabiƚixada), el che, se fuse cusì, sarìa anca ben. D7000 e D70 ƚe xé màchine de sostansa. No rèsta altro che ciaparla in man; se ƚa rexultarà trèsa e confortévoƚe come ste ùltime penso che ƚa vegnarà presto inte l me parco màchine. A 2000 euri, prèso de 'l còrpo, no xé da starghe a pensar sora.

  Tuto ciò oviamente el vien a vantaxo, sora de tuto, de i me clienti