Gavemo un servisio novo in arsenal.

"Pixlr" no'l xé nòma che un software par fotoritoco a gratis come altri, el xé special, e basta pochi menuti par réndarse conto. Se laora co' na interfacia simil-Photoshop, el gà na baxe de stromenti pì che suficente par laori amatoriaƚi (oncora no ghe xé alternadive profesionaƚe a Photoshop - no se pol vixionar i file vèrti soto profiƚo de coƚor, prexenpio). El xé rapido e precixo, daché el gà na sèrie de inpreste limitada.

• Se pol descargarlo 'fà aplicasion o...
• No ocor istaƚarlo, se ƚo vèrxe on line
• Se ƚo gà senpre soto man, basta 'ver drio o ramentarse el link: pixlr.com
• Se pol cargar e salvar file so'l ordenador local o spedirli on line
• El pol vèrxar file PSD, oltre che i pì difuxi par el web e ƚa stanpa
• El laora file co' i so strati e el pol salvarli inte 'l so formato PXD

Clicar so "Open photo editor/Editor" e se xé pronti a laorar deƚongo. Naturalmente ƚa prima ròba da far co se ƚo vèrxe ƚa xé de canbiar lengua in "English", par catarse sùbito in anbiente familiar, e 'pò se và via guaƚivi co'l laoro. Come senpre, purmasa, ƚa tradusion italòfona ƚa xé tradisional (cioè tradisionalmente stùpida): layers="livelli", levels="livelli", e via stranbotando. Ghe xé parfin un par de menù che i ciama na calche regoƚasion de "livelli", sensa posibiƚità de desernir e saver còsa che se xé drio dar. Se te pol, dòpara senpre ƚa interfacia in inglexe, ƚa lengua de i gràfeghi e fotògrafi de ƚa comunità comunicante. Ma in fin de i conti no ghe xé maƚani.

So 'l sito, de xonta, ghe xé anca un canpionario de filtri pre-definìi (Retro vintage effects/O-matic) da aplicar sora a na someja xà fata, sensa pasar par el programa de ritoco, naltra funsion che ghe interesarà a chi che i xé in serca de spisiar in do secondi un calche scato poco interesante.

pixlr.com

Naturalmente un programa de ritoco no 'l xé tuto. Par fotografar senghe vol el formato de riprexa che ghe vol, 'l obietivo che ghe vol, ƚa incuadradura che ghe vol, diframa e tenpo che ghe vol, ƚa luxe che ghe vol e ƚa tènica che no se gà mai fenìo de inparar, però anca un programa de fotoritoco ancùo el fà parte de tuto 'l armamentario.