Se te vol vèrxer i file raw de ƚa to ùltima màchina, ma te gà na version vècia de 'l Photoshop, che no ƚa supòrta i modèƚi de màchine pì "avansài"(*), te pol continuar a laorar sensa problèmi:
descarga "Adobe DNG Converter 7.2" (clica so "Proceed to download", el xé GRATIS) e converti i file RAW in DNG. El Camera Raw el podarà vèrxar i DNG de ancùo e de'l futuro (inte'l to Converter te pol definir ƚa version de Camera Raw co' cui rénder conpatìbiƚi i file).
Se da na parte el "JPG" el xé un formato conprèso standardixà, ògni produtor de màchine invense el gà el so formato RAW cusì, calche ano fà, Thomas Knoll el gà pensà de far un formato da propor a'l marcà (co' scarso sucèso) come standard: el DNG. El DNG el xé un formato RAW che el gà el vantaxo (i dixe in Adobe) de èsar el formato universal (Digital Negative) de'l futuro, e ƚa scomodità par scuaxi tuti nialtri de farne pèrdar tenpo a convertir i file (se te gà na Leica o na Pentax prexenpio no te gà da convertir gninte, el DNG el xé deventà el RAW nativo de ste marche).
Ƚa ùltima version de'l DNG ƚa xé ƚa 4.1 e ghe xé anca novità interesante che ƚe aumenta ƚa potensa de'l formato.
Adobe ƚa ƚe lista cusì:
-
Default User Crop
-
Transparency
-
Floating Point (HDR)
-
Lossy Compression
-
Proxies
Ƚa pì interesante de tute ƚa xé ƚa conpresion che ƚa permete de salvar spasio e tenpo. Purmasa ƚa xé "Lossy", cioè se pèrde na parte de informasion, ma par el 90% de i caxi ƚa và pì che ben. Rèsta senpre oviamente ƚa posibiƚità de salvar el DNG intièro e, òcio, el DNG in formato baxe el xé xà conpatà "lossless" (sensa pèrdita de dati) e el òcupa tanto manco spasio de un RAW non conpatà.
Co' sto axornamento ùltimo, el formato DNG el deventa pì sìmiƚe a'l potente Nikon NEF (o altri formati RAW avansài), anca se el NEF el gà do mètodi de conpresion: Lossy e Lossless (sensa pèrdita), oltre a 'l non-conpatà che no'l gà da bexon de algorìtmi de desconpatasion.
Par farla curta, mi dòparo deƚongo i NEF o RW2 da ƚe me màchine parché gò senpre el PS axornà ma, se te gà el problèma de conpatibiƚità de cui sora, te pol doparar el DNG; el xé varentìo, no 'l costa gninte e i to file i sarà artanto raw come de prima (ùnica avertensa: se gà da doparar Camera Raw par vèrxerli). Ƚo consejo mi personalmente.
Descarga "Adobe DNG Converter 7.2" (clica so "Proceed to download")
Pàxena co' tute ƚe màchine suportàe
(*) "Avansài" par mòdo de dir. Savemo ben invense che el continuo axornamento de i formati RAW ƚa xé nòma che na operasion de protesionismo comercial da parte de i produtori. Ghe vorìa un paràgrafo a parte par tratar 'l argomento.
