Parlando de'l pì o del manco co' un cliente/amigo semo rivài a i obietivi longhi da doparar in caxi in cui se vòja un staco de'l sogèto "tridimensional" tìpico de ƚa fotografìa so formato pì grando.
A'l che el salta fora: "me ocor asoƚutamente un 300mm f2.8". -"E parcòsa f2.8?" - ghe digo mi. - "Par 'ver chel efèto de bokeh co'l sfondro tuto fora fogo" - el me dixe ƚu.
Momento, momento, cari amighi, femo un fià de ciaro so ƚa custion:
Se se gà da fotografar na gara de ginàstica "indoor" in luxe artificial (senpre masa poca) e se vol fermar el movimento, se gà da doparar un tenpo ràpido e un diaframa vèrto. Varentiso mi che co' un 300mm f/2.8 o un 200mm f/2 (oncora pì "ràpido") se gà un fora fogo da fiaba, e vorìa anca védar, tirando fora ta'l tacoƚin da 4 a 8 miƚe euri boni (ognun). Ma xéƚo obligatòrio un supertele f2.8 o f2 soƚo che par ixoƚar el sojèto?
"Vien co' mi" - ghe faso, e ƚo meno fora inte'l "parco" cuà davanti (mi ƚa ciamo "ƚa scoasèra anbientaƚista"). Meso suxo el 50-300mm f4.5 so na màchina 24X36, faso un scato a 300mm tuto vèrto. "Vusto védar che fora fogo che te gà a 300mm/f4.5? Ma te dirò de pì: vusto védar còsa che sucede a f11, e stesa focal?" - E faso naltro scato de'l steso sogèto a f11 (me despiaxe no 'ver meso ƚa màchina in trapìe par far do incuadradure precixe).'Pò vegnimo drento e verxemo i jpg sol monitor:
300mm, 1/500 f4.5 (tuto vèrto), 200ISO:
Crop 100% co' sfondro distante (poca ròba a fogo parché ghe xé rame a tute ƚe distanse):
Crop 100% a ƚa baxe (sfondro a pochi cm):
- "Sì, ma a f11 canbia tuto" - Nò! no canbia un pìfero!
Ƚa moral de ƚa fiaba ƚa xé:
-
Fà de pì na focal longa che un diaframa vèrto, in caxo de efèto "DOF" (depth of field) strento e ixolamento de 'l sogèto.
E no ocor 300mm; anca a 200mm e f4 o 200mm f5.6, o anca a 200mm a f8, se se fotògrafa sogèti pì darente (tìpico "teston" de ritrato) se destaca anca masa (tanto che xé difìsiƚe ciapar a fogo naxo e òci contenporaniamente, prexenpio).
Se pòdeƚo vér un "bokeh" pì bèƚo de cuesto (pì cremoxo)? Sì, ma dipende da ƚa costrusion òtica (in xènare da ƚa fatura de'l diaframa) pì che da ƚa luminoxità reƚativa; inte'l caxo de sto obietivo particoƚar prexenpio ghe xé un fora fogo pì cremoxo co'l diaframa pì sarà che nò vèrto. Se gà da bexon de vertaure a f1,4 o f2 soƚo co' focaƚe pì curte, soto i 50mm, e so formati pì ridoti (DX o 1'' o 4/3 o sìmili).
300mm, 1/500 f11, 800ISO:
Crop 100% 1:
Crop 100% 2:
