Ghe semo, da jèri sò drio laorar co' Photoshop CS6.
A partir co' sto servisio scatà ancùo credo che podarò andar xà in produsion deƚongo, no gò catà inconvenienti de sòrta, ansi. Magari gavarò da scominsiar a pensar a i 64bit, ma cuesto dipende da ƚe dimension de i file RAW, senpre pì grandi, pì che da'l software. Par chi che i laora soƚo che co' file de 10-15Mb pòso confermar che tuto el nàvega guaƚivo sensa problèmi anca in XPpro SP3 a 32bit co' soƚo 2-3 Gb de RAM. Chi che i laora anca co' file de 20Mb e pasa, o i fà video Full HD, mèjo pasar a 64bit co' 8-16Gb de Ram.
Prime inpresion cosesìa inpresionanti, come che se prevedeva. I stromenti novi i dà oncora pì posibiƚità de otimixasion e espresion, sensa contar cueƚi par el ricùpero de difèti de òtica, distorsion, aberasion ect... El supòrto de ƚa acelerasion gràfega el dà na esperiensa niova de vixion a monitor.
El novo Camera Raw 7.1 el xé un capìtoƚo da so pòsta. Xé stà potensià i stromenti luxe/onbre e de coresion òtica. Anca ƚa ridusion de'l desturbo ƚa me par pì eficente. Xé posìbiƚe prodùxer file co' efèto grana non distinguìbiƚe da un orixinal so film. Tuto el material profesional el pasa da Camera Raw, par i utenti de Photoshop. Ƚa fotografìa vera se ƚa scata scuaxi senpre in RAW (dipende da còsa che se inpegnemo a far, ma indicadivamente dixemo 90% RAW, 10% JPG). Se te gà na màchina recente e el to Camera Raw no'l vèrxe i file, te pol proar a convertirli in DNG. Se anca el to "DNG Converter" no'l xé conpatìbiƚe vol dir che te gà na màchina "masa recente" e no te rèsta altro che cronpar ƚa edision ùltima, CS6 par Photoshop e 7.1 par Camera Raw.
Gò inportà tute ƚe asion e inpostà sensa problèmi i tasti ràpidi come che xèro bituà prima, ƚa edision CS6 ƚa xé pì potente, non difarente. No ghe xé da inparar un programa niovo.
So'l lato video, ƚa elaborasion de file a alta resoƚusion Full HD ƚa xé masa lenta par ser considerada come stromento de produsion efetivo. Ghe xé de bon che se dòpara tuti i (potenti) stromenti de regoƚasion de Photoshop sora un livèƚo (che el corisponde a na tracia de timeline) ma pròpio par cuesto anteprima e rendering i xé masa lenti in FullHD. No xé oncora el caxo de ƚasar in parte software de produsion Video veri e pròpi.
Par editar filmadini de dimension pì ridota se pol farlo sensa problèmi.
In sìntexi, Photoshop el rèsta el ponto de riferimento par el fotoritoco e ƚa produsion profesional de imàxine. Giudisio: buy.
Photoshop CS6 in véndita so Amazon.it:
|
Windows7/XP
|
Axornamento W7/XP
|
Axornamento Mac OSX
|
|
