Paint.net el xé un software potente de fotoritoco par Windows disponìbiƚe gratis descargàndoƚo da sto link: www.getpaint.net
Paint.net el se xonta a 'l pì famoxo Gimp, e el gà funsion veramente interesante e avansàe, come ƚa gestion de i strati (rèsta senpre ƚa tradusion ridìcoƚa taliana tìpica de i ridìcoƚi che i gà tradoto par primi Photoshop: Layers=Livelli e Levels=Livelli. Poco mal, basta dopararlo in inglexe, e no ghe xé gnanca da istaƚar ƚa version in lengua, ƚa lengua se pol desernirla indretamente da i menu).
El consejo par chi che i laora in gràfega e fotografìa el xé de doparar i software in inglexe, sinò se xé tajài fora da 'l scanbio de tèniche, soƚusion, informasion co' tuti i profesionisti de 'l mondo. Chi che i frecuenta i me corsi i inpara Photoshop, parché no ghe xé alternadive profesionaƚe, ma chi che i vol rangiarse da so pòsta i gà anca sti software co' cui i pol far almanco ƚe ròbe de baxe.
Còsa che ghe ocor:
Windows 7 (racomandà) o Windows XP SP3, o Windows Vista SP1 (SP2 e Platform Update racomandà)
procesor 800MHz (dual-core racomandà)
512MB RAM
1024 x 768 mìnimo resoƚusion de schèrmo
200+ MB de spasio disco fiso
Opsional: modaƚità 64-bit par chi che i gà un procesor a 64-bit CPU e un Windows a 64-bit
